(( حطاطه والخيانة ))

(( حطاطه والخيانة ))

(( من ضمن سلسلة مواضيع رافعيات الجمعة ))

ملاحظة :أعتذر لغيابي في الأسابيع الماضيه وذلك لأجرائي عملية قبل أسبوعين تكللت بالنجاح والحمدلله , وكلي رجاء أن يحوز هذا الموضوع على رضاكم وأستحسانكم .




بعد أنتهائي من مقابلة أحد المراجعين في عيادتي النفسية , هممت بترتيب عيادتي وطاولتي قبل الخروج من العيادة , وأنا ألملم أشيائي الخاصة سمعت دوي نقاش حاد خارج أسوار العيادة , وتحديداُ عند موظف الأستقبال في صالة المراجعين , ذهبت أستقصي عن الموضوع , فأذا بي أرى شخص لاتكاد ترى من جسمه شيئ والسبب يعودلأنه يرتدي نظارة ومتوشحاً بشماغ يغطي معظم وجهه والسبب يعود للثمه التي لم تعد تظهر من وجهه شيئاً , ولكن الغريب في الأمر أنه كان يرتدي قفازات سوداء اللون في يديه , ومن يراه سوف يعتريه الخوف من طريقة لبسه الغريبة .
سألت موظف الأستقبال عن السبب في كمية الأزعاج والصوت العالي الصادر منهما , فأخبرني بأن الشخص الملثم الذي يقف أمامه مصر على مقابلتي اليوم على الرغم أنه لا يحمل معه أي موعد سابق , وكذلك حضوره في نهاية الدوام الرسمي للعيادة .

طلبت من موظف الأستقبال بأن يسمح له بالدخول في عيادتي , وسمحت له أيضاًُ بالذهاب لإنتهاء وقت عمله .

أدخلت الشخص الملثم لعيادتي وأقفلت الباب من خلفي فبادرني قائلاُ (( هيه ليه تصك الباب ؟؟ ))
قلت له : أحترم نفسك من فضلك أنا الدكتور صاحب العيادة ومن الأفضل أن تخاطبني با احترام .
عندها قدم أعتذاره لي موضحاُ أنه لم يكن يعلم بأنني الدكتور وذلك لعدم أرتدائي لبالطو أبيض كبقية الدكاترة الذين يراهم في المستشفيات .

بعد قبولي لاأعتذاره , بداء يتحدث ويعرف عن نفسه قائلاً :

(( أنا يادكتور أسمي فادي , متزوج وعندي ثلاثة من الأبناء , أحمل الشهادة الجامعية تخصص علوم هندسية <<< أول مرة أسمع بهالتخصص , وعندي مشكلة كبيرة تواجهني مع زوجتي وأتمنى منك تساعدني ))

بعد المقدمة السابقة طلبت منه أن يقوم بخلع نظارته وكذلك اللثام الذي يرتديه على وجهه , وكذلك خلع القفازات اللتي يرتديها في يديه, وأن يمتد على كرسي المراجعين وبعدها يقوم بسرد معاناته .

أخبرني أنه سوف يفعل أي شيئ سأطلبه منه الا أن يكشف شخصيته أمامي , وتعلل بأنه يتبع أسلوب لورانس البالتوك عند أجرائه مقابلة مع احد القنوات أو المجلات , حتى لاتنكشف شخصيته الحقيقة , قلت له (( غطيت وجهك باللثام والنظارة قلنا يالله ماتبي تنكشف وتبي تسوي مثل لورنس , ولكن علمني لابس دسوس في يدك ليه , الموضوع شكله أحد أثنين : يا أنك بردان بهالصيفيه ؟؟ أو أنك جاي تسوي جريمة ؟؟ ))

أرتبك الملثم وضحك على أستحياء ثم قال (( لا والله بس حبيت أتخفى بشكل كامل ))

قمت بوضعه بين خيارين : أما أنه يقوم بخلع كل مايرتديه على وجهه ويديه , والخيار الثاني مغادرة العيادة دون مساعدته في حل مشاكله .
بعد تفكير عميق منه , وفحيح غضب صادر منه , قام بخلع النظارة وأتبعها بفك اللثام ومن ثم خلع مايرتديه في يديه من قفازات .

صدمت من الذي رأيته , فهذا الشخص ليس بالغريب , أنه هيكل العظمي لصديقي حطاطة , الذي فرقت بيني وبينه السنين بعد ماقرر يترك الدراسة في الثانوية كمنتظم في النهار والدراسة في الثانوية الليلية أجل معاه بكالوريس علوم هندسيه وهو جندي في الدفاع الجوي ((صدق الدنيا ماترحم)) , يتضح أنه فقد الكثير من وزنه , عندما ترى وجهه لاتشاهد سوى العظام التي برزت بشكل كبير على محياه .
ما الذي يا ترى جعل حطاطه يبدو بهذا المنظر المتهالك , طلبت من حطاطة عفوا فادي التحدث بأسهاب عن مايواجهه من مشاكل .
بعد دقائق من السكوت تحدث بصوت خافت بالكاد أسمعه :
(( أنا يادكتور متزوج بنت امام مسجدنا بالحارة اللي كنا ساكنين فيها , والحمدلله زوجتي مو مقصرة معاي في شيئ , بعد أربع سنوات من زواجي منها , حسيت أنها ماعاد تحبني مثل الأول , تخيل بعد أربع سنوات زواج لما أجي أتكلم معها من قريب تقولي(( فادي متى اخر مره تسبحت )) رغم أني أشتري أغلى عطور وأفرشي أسناني يومياُ ؟؟ وملاحظ بعد أنها تهتم بعيالها أكثر مني , وتتهمني أني مقصر بحقها وبحق البيت وأني أضيع وقت كثير وأنا أكلم بالجوال , تخيل يادكتور حتى راتبها اللي أول كانت تعطينياه جزء كبير منه صارت ماتعطيني منه شي ولما أسألها عن السبب تقولي (( أنت تضيع الفلوس على حاجات ماتسوى )) ولما أسألها عن راتبها وين تصرفه تقول أنها تصرفه على عيالها وعليها والباقي تعطيه أمها وأختها العانس , تخيل يادكتور تبدي أمها وأختها على أبو عيالها (( بعد هالجملة سقطت دمعه على خد حطاطه قام بمسحها بطرف شماغه بسرعه )) ثم أردف قائلاُ : مصروف البيت صرت أنا أتحمله لحالي , هي بس عليها راتب الشغاله وأغراض عيالنا , طيب يادكتور خل كل هذا على جنب أنا أشك في أنها تخونني ))

قاطعته بعد جملته الأخيرة وقلت له : (( أستغفر ربك يافادي , ترى بعض الظن أثم ))

قال : خلني أقولك كيف شكيت أنها تخونني ؟؟
قلت له : تفضل يافادي كلي أذان صاغيه ؟؟

قال (( يوم من الأيام كنت جاي من برى البيت ولاحظت فيه واحد واقف قريب من بيتي , ولما شافني مشى على طول , أنا عديتها وقلت يمكن صاحب السيارة مضيع البيت والا عنده شي خلاه يوقف عند باب البيت , ولكن بعد فترة كنت راجع من الاستراحه اخر الليل وكنت أكلم صديقتي ,ولما شافني راعي السيارة شغل سيارته ومشى , أنا قلت لصديقتي بسالفة هالشاب اللي دايم يوقف عند باب بيتي ولما يشوفني يمشي , جزاها الله خير نبهتني أنه ممكن يكون صديق زوجتي , وأن زوجتي تخونني في غيابي عن البيت مع الشاب هذا , قلت لها لا زوجتي مستحيل تصير ساقطه وتخونني , قالت صديقتي طيب أنا الحين ساقطه يوم أني أخون زوجي معاك ؟؟ قلت لصديقتي لا أنتي غير , أنتي زوجك مو مقدرك على حسب كلامك وأنتي أنسانه حساسه وتحتاجين حنان ومشاعر ولقيتي عندي هالمشاعر .
قالت صديقتي : طيب أنت وش يضمن لك أن زوجتك ماتخونك ؟؟ أنا أكلمك قدام زوجي على أساس أنك بنت , وهو مسكين مايدري وين ربه حاطه , وأنت الظاهر مثل زوجي .
أنا عصبت عليها وقلت ألتزمي حدودك , شكلك ماعرفتيني زين ؟؟ أنا يسموني ذيب الجماعه وماعاشت اللي تخونني , وسكرت السماعه في وجهها .
دخلت البيت لقيت زوجتي في الصالة تكلم بالتلفون , ولما شافتني على طول قالت (( مع السلامه ياماجده زوجي جاء أكلمك بعدين )) أنا لما شفت تصرفها هذا شكيت في الموضوع ؟؟ ليه ماكملت السالفه اللي بينها وبين صديقتها ؟؟
بعدين معقوله في بنت في الدنيا أسمها (( ماجده )) أكيد أنها تكلم صديقها اللي أسمه ماجد وتناديه ماجد مثل صديقتي يوم تسميني قدام زوجها (( فاديه ))

وقفت قدام زوجتي وعطيتها عيني الحمراء وقلت من كنتي تكلمين ؟؟
قالت وهي تمثل علي دور البرائه : هذي جارتنا الجديدة ماجده تبيني أسير عليها بكره .
قلت في نفسي والله أن صديقتي صادقه , لأنها تخون زوجها معاي وتعرف كل حركات الحريم .

بعدها ناظرت زوجتي نظرة شك ورحت لغرفة النوم ووقفت ورى الباب أناظرها من فتحة الباب وأنتظرها صديقها يدق عليها مرة ثانية مرة , أنتظرت ساعه ومادق جوالها , قلت أكيد صديقها مثل حالتي مطلع شريحه ثانيه يكلم فيها زوجتي وخلص رصيده وماقدر يتصل عليها , بعدها رحت نمت وأنا أقول طيب والله لا أصيدك يوم من الأيام .

ثاني يوم كلمت صديقتي وقلت لها اللي صار يوم دخلت البيت
.
قالت لي : أنا قلت لك أنها تخونك , وأنت ماصدقتني .
وعلمتني بعض حركات الحريم اللي يخونون أزواجهن , ونبهتني من أن زوجتي تصرف راتبها على صديقها , كل مازاد شكي بزوجتي كل مازادت مكالماتي لصديقتي وأعلمها عن اللي تسويه زوجتي أول بأول .

مرت الأيام وأنا شكي كل يوم يزداد بزوجتي , وفي أحد الليالي قمت من النوم ومالقيت زوجتي بجنبي بالفراش , رحت غسلت وجهي ورحت للبلكونه وتفأجات أن صديق زوجتي واقف قدام البيت ومعاه لاب توب بحضنه وجالس يكلم بالجوال , قلت هذي فرصتي أني أكشف كل شي , رحت للصاله أشوف زوجتي وش تسوي لقيتها حاطه على قناة المجد ومقصرة الصوت وجالسه تصلي , قلت في بالي قديمة الحركات هذي , مسكت معاك صلاة في نص الليل أجل ؟؟

رحت للغرفة وسحبت المسدس ونزلت مره ثانيه للصاله , لقيت زوجتي جالسه تسبح وتستغفر , لما شافتني خافت وصاحت وقالت ليه ساحب السلاح يافادي ؟؟؟ قلت لها روحي ألبسي عباتك وغطي وجهك وأنتظريني في المجلس.
قالت : علمني وش عندك طيب ؟؟
قلت لها : بعد شوي تعرفين يازوجتي الوفي ؟؟

طلعت أتسحب بالشارع , كان صديق زوجتي مشغول بالاب توب , تسحبت على الزفلت لين قربت من سيارته , بعدها وقفت وحطيت السلاح بوجهه وطلبت منه ينزل ويمشي قدامي .

قاطعته عندها وأنا أشيل نظارتي وأحطها على المكتب : طيب وش كانت ردة فعله ؟؟

ضحك فادي ضحكة غبيه وأردف قائلاً : ردة فعله أنه قمط وسواها على ملابسه , وقال خلنا نتفاهم بالأول لو سمحت , وطلع جواله ومحفظته وقالي خذ اللي تبيه بس خلني أروح لزوجتي وعيالي سليم ,
قلت له :خلي أغراضك معاك وتعال معاي لداخل البيت ياحيوان , أنا راح أوريك كيف تنتهك حرمات خلق الله .
سحبته الى المجلس ودخلته المجلس بالتشويت .
لما شافت زوجتي المنظر قامت تصيح وتبكي وتقول : من هذا ؟؟ حرام عليك خله في حاله ؟؟
قلت : ماعرفتي من هالحيوان ؟؟ هذا الحيوان اللي تقابلينه كل يوم في غيابي , وتخونيني معاه .
وبعدها ناظرت وجهه وشفته مسوي حاله بريئ ماتحملت ونزلت عليه تشويت في وجهه .
قالت وهي تبكي ومو مصدقه للي صاير : حرام عليك تشك فيني ؟؟ والله أول مره أشوف هالأنسان , حرام عليك تظلمني وتظلمه .

بعدين قاطعها صديقها وقال : ياخوي حرام عليك , والله مالي في الكلام اللي قلته , أنا متزوج مثلي مثلك , وما أخاف على سمعتي مثل ماتخاف على سمعتك , وعلى أي أساس قلت هالكلام عني وعن زوجتك ؟؟
قلت له : أنا دايم أشوفك تجي عن بيتي اخر الليل , علمني وش تسوي , غير أنك تنتظرني أطلع من البيت عشان تدخل ؟؟

قال الحيوان : لا ياخوي حرام عليك , أنا أعرف واحد من جيرانكم في الحارة , وعلمني أن فيه عندك في البيت وايرلس دايم شغال , أنا ساكن في حي ماوصلنا الدي ا س ال فيه للحين , ودايم اروح للمقهى ويقفل المقهى بعد الساعه 12 وأجي أكمل شغلي في الانترنت هنا وبعدين أمشي للبيت , أنا ما أنكر أني كم مرة شفتك جاي وأستحيت ومشيت , هذي كل السالفه والله يشهد .
بعدها خليته يطلع من البيت بعد ماحلف أنه ماعاد يقرب من بيتي .
وزوجتي راحت لبيت أهلها بعد السالفه , ومارجعت للحين .

ولكن الغريب في الموضوع يادكتور ثاني يوم كلمتني صديقتي تعلمني بقصة زوجها اللي طلع الشاب اللي ضربته وكنت أظن أنه صديق زوجتي ؟ ماعلمتها أني أنا اللي ضربت زوجها عشان ماتتشمت فيني ؟؟

قاطعته وقلت : طيب يا (( حطاطه )) مفروض بعد اللي صار تقطع علاقتك بصديقتك وترجع زوجتك وماتشك فيها مره ثانيه ؟؟
صرخ بوجهي حطاطه قائلاً : هيه أنت وش دراك أن أسمي السابق حطاطه ؟؟ أكيد أنت تعرف زوجتي ؟؟ هي اللي قالت لي تبيني أرجع لك لازم تروح عند دكتور نفسي ؟؟ أكيد أنت تبيني ما أشك في زوجتي عشان تأخذ راحتك معاها ؟؟

بعدها قمت بتهدئة حطاطه وحلفت له بأنني ما أخونه مع زوجته , وبعد ذلك ذهبت خارج عيادتي وأقفلت باب العيادة وحطاطه بداخلها , وأمسكت بالهاتف الموجود على مكتب الأستقبال وقمت بالأتصال على (( مستشفى الأمل للصحه النفسيه )) طالباُ منهم الحضور لأخذ حطاطه لكي يأخذ فترة نقاهة في مصحتهم النفسيه .


أنتهت القصه ,,,



ملاحظة : من النادر أو من المستحيل أن نجد شخصاً شكاك ليس له علاقة غير شرعية أو ليس له ماضي غير نزيه .
أنا لا أطالب بأن يترك الحبل على الغارب , ولكن أطالب بالتريث قبل السماح للشيطان بتكوين صور سيئة في مخيلتنا عند عدم أحساننا الظن بأي شخص كان .


تقبلوا تحياتي