(( صور أختي ))

(( صور أختي ))
قصة واقعية 



محادثه في البي بي ماسنجر :

عقيل : حبيب قلبي حطاطه ممكن خدمة صغيرة ؟؟
حطاطه : شوف يا عقيل سلف ما عندي ,, غير كذا أبشر أنا حاضر ؟؟
عقيل : ههههه ,, من عرفتك وأنت طفران يا حطاطه ,, ما أبي منك سلف ولا شيء ,, بس أبي أسألك من وين جبت صورة البنت اللي في صورة العرض عندك ؟؟
حطاطه : اهاا ,, أعجبتك صح  ,, كل الشباب اللي عندي في اللسته خقوا معاها وحفظوا الصورة عندهم وخلوها صورة العرض حقتهم ,, ولا تسألني من وين جبتها ,, لاني أخذتها من جوال ولد عمي بدون ما يدري .
عقيل : طيب يا حطاطه ,, أنت مو ملاحظ أن البنت اللي في الصورة كأنها ما تدري أن فيه أحد يصورها ؟؟
حطاطه : ايوه لاحظت الشيء هذا ,, هذي حركه فنيه منها عشان تخقق الشباب  ,, لأنها عارفة أن الصورة تكون أحلى لما تتلقط بعفوية .
عقيل : طيب يا حطاطه من الأخير بقولك اللي في بالي ,, أنا أحس أن البنت هذي مسكينه وتصورت بدون ما تدري ,, وممكن اللي صورها واللي وزع الصورة وحده من صديقاتها ناويه فيها شر ,, عشان كذا ياليت تغير الصورة وتمسحها من جوالك .
حطاطه : هههههههه ,, تمزح يا عقيل صح ,, قلي أنك تمزح .
عقيل : لا والله ما امزح يا حطاطه ,, انا اتكلم جد .
حطاطه : أنت يا عقيل مسوي أنك شخص مثالي وما ترضى شيء على بنات الناس ,, ياخي ترى الدنيا تغيرت وبنات الناس مو على خبرك ,, بعض البنات تصور و ترسل صورتها لصديقها ,, وبعضهم تصور و تنشر صورها عشان تشتهر ,, وبعضهم أهلها منفتحين وعادي عندهم لو بنتهم تكشف وما تتغطى ,, فما بالك لو كانت صور بنتهم منتشرة بكل الجوالات ومواقع الانترنت ,, أكيد راح ينبسطون ,, لأنهم والعياذ بالله ما عندهم غيره على محارمهم مثلنا .
عقيل : نسيت تقول يا حطاطه ,, بعض البنات وثقت في شخص وأعطته صوره لها على أساس أنه أنسان ثقه ونيته سليمه وراح يتزوجها في النهاية ,, وبعضهم تم تصويرها من صديقتها في مناسبة عائلية والا في الكلية والا في مدرسة عشان تنتقم منها ,, وبعضهم أنسرق جوالها وفيه صور لها واللي سرق جوالها نشر الصور ,, ليه ما تقدم أحسان الظن دايم في حياتك ,, من عرفتك وأنت دايم تسيء الظن في الناس .
حطاطه : اوووف ,, تكلم الأنسان المثالي ,, خلاص يابوي روقنا ,, من الآخير الصورة ما راح أغيرها ,, تبيني أغيرها أحط صورة مين؟؟ فنان والا لاعب ,, أنا أحب البنات وأحب صورهم .
عقيل : طيب ياخوي ما قلنا شيء ,, حط صورة ممثلة أو مطربة ,, على الأقل الممثلة او المطربة اللي بتحط صورتها راح تكون عارفه ان صورتها منتشرة وما همها شيء ,, أما مسألة أنك تحط صورة بنت سعودية باين انها على نياتها ,, هذا اللي ما توقعته منك .
حطاطة : أقول ماني فاضي لك يالفيلسوف ,, صرف عمرك ,, جالس أدردش مع خويتي وهي زعلانه وغيرانه لأني حاط صورة البنت هذي ,, الحين بقول لها دامك غيرانه وريني صورتك عشان أقتنع أنك أحلى منها وأمسح صورة البنت اللي حاطها في صورة العرض ,, يالله يا عقيل برب .
عقيل : تيت ياحطاطه الخرتيت 



بعد مرور ما يقارب سبعة شهور من هذه المحادثه دار هذا الأتصال بين حطاطة وعقيل :

عقيل : هلا والله وغلا بحطاطة ,, حمدلله على السلامة ,, تو ما نورت الشرقية ,, قلي متى وصلت أنت وأهلك من الديرة ؟؟
حطاطة : أقول وينك بسرعه ,, بقول لك شيء 
عقيل : الله يستر ,, خير يا حطاطة وش فيه ,, نبرة صوتك تخوف 
حطاطة : يبن الحلال علمني وينك فيه وأذا جيتك بقولك اللي صاير .
عقيل : يارب سترك  ,, أنا في البيت يا حطاطة 
حطاطة : طيب مسافة الطريق وأنا عندك 



بعد مرور خمس دقائق على تلك المكالمة ,, التقى حطاطة بعقيل ودار هذا الحوار :

حطاطة : والله مدري وش أقولك يا عقيل 
عقيل : ياخي خوفتني ,, أول مره في حياتي أشوفك مرعوب وخايف وقلق للدرجة ذي ,, حتى يوم رسبت في 7 مواد في أول ثانوي ماكانت ردة فعلك كذا 
حطاطة : مصيبه مصيبه وحلت على راس عايلتنا يا عقيل .
عقيل : أفاااا ,, ليه وش صاير يا دافع البلا 
حطاطة : أمس وصلنا من الديرة أنا وأهلي ,, ولكننا تفاجئنا أن بيتنا مسروق ,, أغلب الأجهزة الكهربائية ,, ومبلغ 70 الف ريال ؟ وجميع الأوراق والمستندات المهمة .
عقيل : وشوووووو ,, من جددددددددددددددددك ,, اعوذ بالله ,, طيب يا حطاطة وش سويتوا ؟؟
حطاطة : سوات الله يا عقيل ,, رحنا بلغنا الشرطة ,, وعملوا البصمات ,, وللحين يدورون على الحراميه ,, بس هذا كله يهون يا عقيل ,, فيه مصيبه أعظم
عقيل : ياخي تراك رافعن ضغطي  ,, قلي كل اللي عندك مره وحده ولا تقسط علي السالفة 
حطاطة : فيه شنطة أنسرقت من البيت ,, وكلها صور لعائلتنا ,, فيها صور لخواتي في حفل زواج أختي الكبيرة أم عبدالعزيز ,, وفيه صور بعد لحفل لملكة أختي الثانيه اللي زواجها بعد شهرين من الآن ,, والمصيبة أن أخو نسيبنا أبو عبدالعزيز شاف صورة أختي الكبيرة في أحد المنتديات ,, وعلم أخوه أبو عبدالعزيز ,, ونسيبنا حملنا مسؤولية للي صار ,, وقال لي تدبر موضوع صور أختك ,, والا ترى راح أطلقها ,, وأختي الثانية اللي كتبنا كتابها قبل خمس شهور خطيبها درى بالسالفة وقالها أن الزواج ما راح يتم لو أنتشرت الصور ,, ومن البارح وحنا متبهدلين وحالتنا حالة يا عقيل 
عقيل : الله يكون بعونكم يا صديقي ,, وأسأل الله أنه لا يبتلينا بمثل بلواكم .


بعد مرور أسبوع على ما حدث في الأعلى ,, دار هذا الحوار بيني وبين صديقي حطاطة على البي بي ماسنجر :


حطاطة : افاااااا يا عقيل ,, مخلي صورة العرض حقتك لبنت مسكينه يمكن ما تدري أن صورتها منتشره ؟؟
عقيل : هههههه ,, الله يرجك يا حطاطه ,, هذي يا طويل العمر صورة الفنانة فطومه 
حطاطة : حتى ولو يا عقيل  ,, ياخي يمكن هي ما تبي صورتها تنتشر  ,, ترى عندك أهل يا عقيل ومفروض ما تنسى الشيء هذا  


أنتهت

تفاصيل القصة وطريقة كتابتها :
الحوار الأول الذي دار بيني وبين حطاطة في القصة حدث فعلاُ ,, بعد ذلك الحوار بمدة وصلتني رسالة على بريدي الالكتروني من أحدى المتابعات تطلب مني أن أكتب موضوع عن صور البنات السعوديات ,, وشرحت لي معاناتها بعدما عادوا من أجازتهم الصيفيه ووجدوا منزلهم تعرض للسرقة ,, ومن أبرز الأشياء المسروقه هو ألبوم صور حفل زواج شقيقتها ,, وأوصلت لي حجم المعاناة التي صابتهم ووضعتهم في موقف لا يحسدون عليه بين أقاربهم وجيرانهم ,, وعن فسخ عقد زواج لأحدى شقيقاتها بسبب أنتشار بعض الصور لهن في المنتديات والجوالات المحمولة .

قادني خيالي ليضع حطاطة بطل لهذة القصة بدور شقيق الفتاة المنكوبه صاحبة الرسالة المبكيه ,, ليعلم ويعي بأن حديثي له ليس من باب المثالية والتصنع ,, وأنما من باب أحسان الظن ,, ومن باب الستر على الناس
قال تعالى 
(( إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ ))


نصيحة للفتيات :
نحن في مجتمع محافظ ,, لذا يجب أن تشعري بقسوة ومرارة ما قد يحدث لك في حال أهمالك للصور الخاصة لك أو لشقيقاتك وصديقاتك ,, وأنها قد تكون سبباُ في دمار السمعة ,, لأن بعض الأشخاص متخلف ولا يرحم ,, .
أستثني من كلامي الفتيات من عوائل غير محافظة 

مدري ليه وأنا أكتب الكلام اللي فوق تذكرت البرودكاست اللي وصلني ومكتوب فيه (( تكفون اللي عنده صوره لبنات لابسين لبس شباب أنه يمسح الصورة ,, لأن الصورة لي أن وصديقاتي ,, صورناها من باب الأستهبال ,, ولكن جيراننا عرفونا من أثاث مجلس الحريم اللي صورنا فيه ,, تكفون أمسحوا الصورة قبل لا توصل لأخواني والله غير يذبحوننا لو شافوا الصورة )) <<< مدري أحط الفيس هذا  والا الفيس هذا  والا الفيس هذا 
أختاروا الفيس اللي يعجبكم 

لنا موعد الأسبوع القادم مع قصة واقعية أخرى ,, من أجمل القصص التي سمعتها ,, حصلت أحداثها بين سوريا والمغرب وجدة ,, وقد تتغير هذه القصة في حال تواجد قصة واقعيه أخرى في جعبتي لأسردها لكم ,, لأنني لا أخفيكم علماُ بأنني أطمح للمشاركة في الأوسكار القادم بتلك القصة ,, ولكن قد أكون مجبر على كتابتها الأسبوع المقبل في حال عدم توفر البديل 

فتكم بعافية