&& ماني مهبول ياجدي &&

&& ماني مهبول ياجدي &&

من سلسلة مواضيع رافعيات الجمعه

أنني أشعر بالحر , من الذي أطفى المكيف وأنا نائم وحرمني من متعة أحلامي؟

فتحت عيناي حتى أنهض وأذهب وأقوم بتشغيل المكيف , لم أصدق في البدايه ما أرى , وجدت نفسي نائماً في خيمه , وحولي ناس كثر مجتمعين , وما أن رأني أحدهم حتى صاح: ( ياجماعه الغريب صحى من منامه )

ألتف حولي جميع من في الخيمه , خفت منهم وخبئت رأسي تحت غطائي , فسحبه رجل كبير بالسن , وناظر الي بكل رحمه ,

وقال(( لاتخاف ياوليدي , حنا لقيناك مرمي على الطريق وفاقد وعيك , وجبناك وعالجناك , والحمدلله أنك شفيت ))

قلت بصوت مرتعب يسووده الخوف (( من أنت ووش تبي فيني ووين أهلي ))

قال ( معاك صعفق وينادوني أبو زيدان )

ضحكت باأعلى صوتي وقمت التفت بالخيمه وأنظر بكل زاويه حتى أستغرب الرجل مني وقال ( وش اللي يضحكك ياوليدي وعلى أيش تدور )

قلت : بلا أستهبال أقول , صعفق أبو زيدان , مسوي أنك جدي وولدك زيدان أبوي , أقول وين موزين الكاميرا الخفيه فيه ؟؟ قديمه حركاتك يامحمد الصيرفي أنت واللحيه المشيبه اللي حاطها على وجهك )

أستغرب الشايب من كلامي وقال : كيمرا خفيه ؟؟ وش تهذري وش تقول ياوليدي ؟؟

بعدها ضحكت بقوه وقلت : زبطت الدور هالمره يامحمد الصيرفي أنا أوريك , وأشد لحية الشايب بأقوى ماعندي , حسبتها تركيب , حتى رفسني , ولما قمت رحت أركض وأنا أضحك قلت : وين المخرج أخذت جوله حول الخيمه أبي أطلع الكاميرا والمصور وباقي فريق التصوير , وصدمت عندما لم أجد شيئاً سوى الخيام والحريم والرجال واقفين خارج خيامهم ينظرون الي بتعجب ,,

عندها بدأت أصدق مايحدث , ذهبت الى الخيمه وقلت للشايب ومن حوله وأنا أبكي : تكفون بلاش حركات مبزره , وين أهلي ووين أنا الحين؟

مسكوني الرجال وبدواء بتهدئتي وأنا منهار وغير مصدق لما يحدث .

شوي قلت للشايب : طيب وين ولدك زيدان خلني أشوفه وأتأكد أن كلامك صحيح .

صرخ الشايب ونادى وقال : يازيدان تعال وأنا أبوك .

قال زيدان بصوت عال : هلا يايبه , وكان مصدر الصوت هو المكان المخصص للنساء ,

قال الشايب : وش تسوي يازيدان ؟؟؟

قال زيدان : أذبح الذبايح للضيف يايبه ,

قال الشايب : أترك الذبيحه عنك وتعال بساع << يعني بسرعه .

منذ أن رأيت ذلك الشاب قادم فز قلبي من مكانه , ولم أصدق مارأيت !! أنه فعلاً يشبه أبي , ومشية أبي وصوت أبي ,,,

كاد أن يغمى علي للمره الثانيه ,, ذهبت أركض والدموع تركض على خدي معي ,,,

الى أن أبعدت عنهم ,,

جلست أفكر ماذا أفعل ؟؟ فقلت أكيد أن الموضوع له علاقة بالمجرات السماويه وأكيد أن احد المجرات سقطت على الأرض ومن تأثيره رجعت الى هذا الزمن



وقلت دعني أكمل يومي حتى المساء وسوف أنام بنفس المكان حتى يعيدني الزمن للوراء .

قطع تفكيري صوت زيدان , أو أبوي !!

قال لي : علامك يالغريب هجيت وأبعدت عن مضاربنا ؟؟

قلت له : أقول بلا مضارب بلا مقاسم , تعال أبيك بكم موضوع .

قالي : امر يالغريب ,,

قلت : أنا ماني غريب , أنا أسمي القبطان ولدك .

قال : ولدي ؟؟ وش تقول يالغريب أنت من جيت وأنت تهذري بكلام ماينفهم .

قلت : خلاص أنا أمزح معاك << صعب تقنعه باللي صار ولازم تجاريهم حسب اللي حاصل .

ثم أردفت قائلاً : أسمع يازيدان , أن شاء الله باكر أنت راح تتزوج , وراح يجونك عيال , أبي أنصحك كم نصيحه تفيدك بمستقبلك .

قال زيدان : أنا منصت لك يالغريب .

قلت : أول شي لازم تدرس , وتتعلم , ثاني شي وأهم شي , أذا جاك ولد رابع , وبغيت تسميه , لاتسميه القبطان , سمه لؤي , خالد , فارس , أي أسم حلو , ودلع ولدك هذا , ولاتحرمه من أي شي يبيه , وزوجه أول مايخلص من الثانويه ولاتخليه يدخل الكليه التقنيه , تراها بتضيع مستقبله وطموحه , خله يدرس برى , المهم أي شي يبيه وفره له مهما كان ,,



شوي تذكرت وقلت : صح وين أخوك فراس؟؟؟ ودي أشوفه ؟؟

أنهبل زيدان من اللي قلته ؟؟

وقال : أنا كل سواليفك مادخلت لي بعقل ؟؟ بس وش عرفك يالغريب باسم أخوي وأنت ماتعرف عننا شي ,,,

قلت : ياحليلك والله أني أعرف كل شي وأنت ماتدري ؟؟

قال : طيب أتحداك تعرف شي ثاني محد يعرفه ,,,

قلت له : أنت ولد قنيطه صح ؟؟ أنهبل وفتح عيونه وأخذ حصاه جنبه وفق بها خشتي , وقال : أخس يالغريب تقول أسم أمي ولا قدامي بعد ؟؟

قلت له وانا أمسح الدم من جبهتي : ياخي خلاص صدقت أني أعرف كل شي ؟؟

قال : أي بالله منت بهين يالغريب ؟؟

قلت: يالله مشينا خلنا نروح لأقرب بقاله نشتري كوكا والا سبرايت والله أني ميت من العطش ,,

قالي : أنت لساعك تهذري ؟؟ أذا كنت عطشان خلنا نروح للغدير .

قلت : يالله مشينا .

رحنا للغدير وياليتنا مارحنا , أنواع البنات هناك , كأني في جيان والا الراشد يوم جمعه ,,

قلت لزيدان : وين رايح يابو , والله أن ذا البدو غير يذبحوننا لما يشوفونا رايحين يم بناتهم .

قال : أقول أمش يالغريب هذول البنات كلهم خواتنا ومافيها شي لو رحنا لهم وأسقونا ميه << ماء نزلنا للغدير ومرينا بجنب البنات وأنا جالس أقزقز فيهم , شوي نقزت وحده وقالت : يازيدان مين هاللي معاك ؟؟

قال زيدان : هذا الغريب اللي لقاه ابوي ورجال القبيله مغمى عليه بالخلاء ,

قالت بكل تشفق وخققان : ياويلي ما أملحه وما أزينه , أكيد أنه فارس وشجاع , قال أبوي بصوت خفيف : والله ماهقوتي << يعني ماظنيت

ناظرت أبوي وأنا أبتسم وأقول في نفسي : بديت تغار مني يايبه ؟؟؟

قال أبوي : يابنات أسقوا الغريب مي ,

شوي الا كل البنات جابوا الماء وهم يبتسمون ويتميلحون قدامي , وأخترت أحلى وحده وأخذت القربه من يدها وشربت ,

وسألتها أنتي بنت مين <<< يقاله يبي يخطبها من أبوها ,, قالت : أنا منيفه بنت خلف الجنيب ,

صعقت لما سمعت وقلت : أنتي أم خالد صديقة أمي اللي أحترق وجهها يوم كانت تسوي غدا لزوجها مرزوق الدب البخيل ؟؟ والي عندها ولد أسمه محمد سربوت وأكبر مروج للخراب بعيال الجماعه ؟؟

قالت بأستغراب : وش تقول يالغريب ترى مافهمت شي من اللي تقوله ,,,

رميت قربة الماء عليها وقلت : اقول مشكوره ومع السلامه والشرهه على زيدان اللي بغى ينكب حظي معاك الحمدلله أني عرفتك والا ماني ناقص أعيش عمري مع وحده وجهها يبي ينحرق <<< أبوك يالدلاخه

رحت أدور على أبوي ولقيته جالس يدردش مع بنت بطرف الغدير , ولما أقتربت منه وقلت : تغازل أجل ؟؟ وتزعجني لاتغازل وعيب عليك ,,,

التفت علي وقال : هذي زوجتي حرمتي يالغريب صار لي أسبوع طالب يدها من أبوها وبكره عرسي والعقبى لك ؟؟

جيت عند البنت اللي يسولف معاها أبوي ولقيتها طاقه اللثمه وتناظرني بحقد , مديت يدي وشلت اللثمه من يدها , صابني الجنون تلك اللحظه ,,

طلعت أمي بس بوجه شاب , بكيت وحظنتها بقوه وقلت : وينك يايمه ماتشوفين اللي صار لي , ماحسيت الا أبوي ضربني بحجره على راسي وأغمى علي بعدها .

صحيت الا وأنا قدام جدي مره ثانيه , والا يقدح من عيونه الشرار ,,, وصرخ علي ويقول : افا يالغريب ماهقيناك كذا , تحضن زوجة ولدي ؟؟ وقدامه ؟؟؟ والله لو ما أنت غريب والله كان ذبحناك ,,,

قلت وأنا مسوي أني متندم : قلت والله الشيطان وزني أني أحضن أمي <<< ماتجي والله يالخبل
سووا أي شي الا تشهرون فيني ويصير لي مثل اللي صار لياسر القحطاني !!

قال جدي : منهو ياسر القحطاني ؟؟

قلت : هذا واحد بالمضارب اللي كنت ساكن فيها , كانوا يمدحونه ويحبونه وبيوم وليله صار مكروه والكل يتمنى له الضرر والمصايب ,,,

سامحني جدي على اللي سويته , دورت على زيدان ولقيته زعلان بطرف الخيمه , جيت يمه وقلتله : سامحني يايبه والله ماعاد أحب امي !!

ناظرني بحقد وقال : والله لو منت ضيف أبوي كان جتلتك <<< لاتلومونه مخاوي عراقي . بعد المغرب بدا يجون الضيوف لبيت جدي , عشان العشاء اللي مسويه لي جدي , مسكت جدي على جنب وقلت له : والله ماظنيت عشاكم يكفي , ذابحين ذبيحه وعازمين كل هالعالم ؟؟

قال : لاتخاف ياضيف حنا ذابحين خمس خرفان !! وأن شاء الله تكفي وزود ,,,

ناظرت فيه وأنا مقهور وقلت بنفسي (( والله أنك كريم ياجدي بس ياليتك حطيت فلوسك كلها بأراضي كان فلينا أمها أنا أوأهلي وعمامي الحين ))

بعد العشاء مشوا الضيوف , بقيت أنا وجدي وابوي زيدان .

قلت : الا صح وين فراس ولدك ما أشوفه ياصعفق << أقصد عمي فراس قال : ولدي فراس أرسلناه للمدينه يتعلم .

قلت : والله أنك كفو مرسل ولدك للخارج يتعلم وليه ماترسل زيدان يتعلم بعد والا ناوي تورطنا بالمستقبل أنا وأخواني ؟؟

قال : لا زيدان خليته عندي عشان يعاونني ويساعدني .

قلت : طيب ياصعفق , تكفى الله يرحم والدينك لاعاد تذبح ذبايح وتضيع فلوسك على هالناس , بيع كل اللي عندك من حلال وروح للمنطقه الشرقيه وأشتر أراضي عند البحر و بحي الظهران ولاتخلي منطقه ماتشتري فيها أراضي , وفيه منطقه ينقالها الشبيلي , روح أشترها وخل أسمها الصعفقيلي , تكفى ياصعفق خل زيدان ولدك ينافس الوليد بن طلال ويكسر راسه بعد .

قال صعفق وهو يبتسم ويناظر في أبوي زيدان :وش رأيك يازيدان باللي يقوله هالغريب ؟؟ نروح مشرق عند البحر عند اللي يأكلون السمك ونسكن هناك ونشتري اراضي لك أنت وفراس ؟؟

قال زيدان : واالله يابوي هالغريب ماهو سهل , يعرف كل شي , وأنا أشوف أن كلامه صحيح وخلنا نرحل للمدينه مشرق قريب البحر ونشتري أراضي ومنها نكون قريب من أخوي فراس اللي يدرس قريب من البحر <<< مادروا أن بين الدمام والرياض 400 كيلو

قال جدي : خلاص على خيرة الله , بعد باكر لما نخلص زواجك راح نرحل مشرق ونعيش هناك .

قمزت وحبيت راس جدي وراس أبوي وأنسدحت بعدها بالطراحه .

قالي جدي : يالغريب تعال خلنا نسمر باقي الليل بأوله .

قلت : تكفى خلني أنام عشان أصحى بكره والا أنا ولد منيلوير ويصير صقيقي خالد ولد الوليد بن طلال , وعندنا فله بحي الهدا مساحته 15 الف هيكتار
وعندي 15 سياره وأدرس في أسبانيا ترم وفي فرنسا ترم وفي أمريكا ترم وكل ترم لي بمدينه .

ضحك على كلامي جدي صعفق وولده زيدان وقال جدي : والله أنك هبيله يالضيف ,,,

قال رافع : أي والله يابوي هالضيف هبيله ويدربيها كل حين .

قلت بنفسي وأنا أبتسم بخبث : باكر تشوف يازيدان هالهبيله وش راح يخليك تصير ؟؟

وبعدها من التعب غطيت في سبات عميق ,

صحيت على حرارة الجو , تضايقت وقلت يووووووووووووه شكلي للحين بديار جدي وأبوي بالزمن القديم ,

وأنا جالس أفكر سمعت صوت بنت أختي الصغيره هدى وهي تغني , وتقول , ماتت قلوب الناس ماتت بها النحوه << هي النخوه بس تنطق الخاء حاء, فزيت من الفراش الا أنا بالمقلط حق بيتنا نايم والكهرب طافي , ناديت هدى وقلت من طفى المكيف ؟؟ قالت : ياحبل التهرب متتوع لأننا ماتتدنا التهرب <<< تقصد يالخبل الكهرب مقطوع لأننا ماسددنا فاتورة الكهرب

رحت أركض بالبيت مثل المجنون وأدور على أبوي , لقيته جالس بالحوش .

جيت جلست قباله والدمعه بعيني .

وقلت : يايبه تذكر لما جدي لقى غريب طايح بالبر , وجابه يمكم ولما صحى من غيبوبته قالكم ونصحكم أنكم تشترون أراضي بالمنطقه الشرقيه ووعدتوه أنكم تشترون ليييييييييييييييييييييييه ما أشتريتوا ؟؟؟؟؟؟؟؟؟

قال : أيه تذكرت , صدقت ياولدي هو نصحنا بس من المهبول اللي ياخذ بنصيحة هبيله ؟؟

قلت : هذا اللي ضيعنا أننا نشوف اللي ينصحونا كلهم مهابيل



مثلأ الحين لو جاني واحد أسمه عبدالله وقالي أنه ولدي وأن الدنيا تقلبت والزمن رجع ورا ونصحني أني أشتري أراضي على طريق الرياض راح أضحك عليه واقول أنه هبيله ومايدري وين ربه حاطه .





نصيحه : شوف الشي اللي مايعجب الناس وسويه وصدقني راح تصير ناجح مستقبلاًُ لأن ماضيع الناس الا كلام الناس


فتكوا بعافيه